LENGO LA SERIKALI NI KUHAKIKISHA KUWA UCHUMI UNAENDELEA KUKUA

Posted on: December 10th, 2024

Mkuu wa Wilaya ya Malinyi Mhe. Sebastian Waryuba  amesema kuwa Wilaya ya Malinyi  inategemea sana uchumi wa biashara yaani kilimo biashara, mifugo biashara,uvuvi biashara na ushirika biashaara, hivyo Serikali itahakikisha  kuwa kila uchumi unaofanyika Malinyi  unakuwa ni uchumi wa kibiashara lengo likiwa ni kuhakikisha uchumi unaendela kukua , mzunguko wa fedha unaongezeka ili Halmashauri ipate mapato, Serikali ipate kodi na Wananchi wapate kipato  cha kuendeleza maisha.

Mhe. Waryuba ameyasema hayo Disemba 10, 2024 wakati akifunga kikako cha Baraza la Biashara la Wilaya kilichofanyika katika ukumbi wa mikutano wa Halmashauri

Sambamba na hilo Mhe. Waryuba amewasihi  Wadau wa Biashara  kutumia Taasisi za fedha kwaajili ya kupata mikopo ambapo maetoa rai kwa Taasisi hizo kuweka mazingira wezeshi ili Wananchi waweze kupata mikopo hiyo kwa urahisi.

“Niwaombe sana  sisi ambao tumebeba dhamana ya masuala mbalimbali kwa niaba ya Umma  tuhakikishe kuwa Sekta binafsi wanakua ni wadau wetu na ni marafiki zetu, tutengeneze mustakabali huo kwasababu Sekta binafsi wakikaa vizuri na Serikali inakaa vizuri ili mahusiano ya biashara na kiuchumi yaendelee vizuri ndani ya Wilaya ya Malinyi” amesema Mhe. Waryuba

Kwa upande wake Kaimu Mkuu wa  Divisheni ya Biashara  Ndugu Msabaha Alawi  amesema kuwa Ofisi ya Mkurugenzi Mtendaji wa Halmashauri imeandaa program maalum  itakayowashirikisha Wadau wa Biashara  kuwajibika  kulipa tozo  stahiki kwa maendeleo ya Serikali ‘MALIZA MWAKA KIJANJA KWA KULIPA TOZO STAHIKI KWA MAENDELEO YA SERKALI’

Akifafanua kuhusu program hiyo Ndugu Alawi amesema kuwa kuanzia tarehe 11 , Disemba 2024 timu ya Wataalamu itapita maeneo yote ya kibiashara kwa lengo la kutoa elimu ya mifumo ya ulipaji wa tozo stahiki  yaani ushuru, ada za leseni  za biashara, usajili wa biashara, utoaji wa namba za malipo na utoaji wa leseni hapo kwa hapo, program hiyo inatarajiwa kumalizika tarehe 3/1/2025.

Wakizungumza kwa nyakati tofauti katika kikao cha Baraza la Biashara  Wadau wa Biashara Wilayani Malinyi  wamesema kuwa  uchumi wa Malinyi unakabiliwa na changamoto mbalimbali ikiwa ni pamoja  ubovu wa miundombinu ya barabara, na  uchache wa vyanzo vya uchumi ambavyo ni kilimo na ufugaji kitu ambacho kinafanya biashara kuwa za msimu na inasababisha uchumi wa Malinyi kutokua imara, kufuatia hali hiyo Wadau hao wameishauri  Ofisi ya Mkurugenzi   kupitia Divisheni ya Biashara  kubuni vyanzo vipya vya kukuza uchumi.